လှမြတ်သက်မူ ၏အမည်ရင်းမှာ မလှမူဖြစ်သည်။ ကောလိပ်ကျောင်းသို့ရောက်သည့်နှစ်တွင် ကောလိပ်ကျောင်း၌ မူမူဟု အမည်တွင်ကာမူမူဟူ၍လူသိသူသိများခဲ့၏။ မယ်တက္ကသိုလ် အရွေးခံရသည့်နှစ်၌ တိုင်းသိပြည်သိသတင်းစာထဲတွင် ပုံနှိပ်စာလုံးနှင့်နာမည်ဖော်ပြကြေညာအံ့ဆဲဆဲ သတင်းထောက်များကို လှမြတ်သက်မူ ဟူ၍ စိတ်တိုင်းကျနာမည်ရှည်ကြီးဖြည့်စွက်မှည့်ပေးလိုက်လေ၏။ ထို့ကြောင့် မလှမူသည် မူမူအဖြစ်မှ လှမြတ်သက်မူ ဖြစ်လာရပေသည်။ လှမြတ်သက်မူဆိုသော အမည်သည် မယ်တက္ကသိုလ် အရွေးခံရသည့်နှစ်၌တစ်ကြိမ်၊ဘိလပ်ပြန်ကိုဘမောင်နှင့်မင်္ဂလာဆောင်စဉ်က တစ်ကြိမ်ဤနှစ်ကြိမ်သည်သာလျှင် ပုံနှိပ်စာလုံး၌ အမည်တွင် လိုက်ရလေသည်။ ယခုတော့လည်း မစ္စက်ဘမောင် ဖြစ်နေရ၏။ မူမူသည်သံရုံးတစ်ရုံးမှပေးပို့လိုက်သောဖိတ်စာကတ်ကို ခုံပေါ်မှဆွဲယူကာ အိပ်ချင်မပြေ့တပြေ မျက်လုံးဖြင့် ဖတ်ကြည့်သည်။ ဖိတ်စာထဲ၌ မစ္စတာနှင့် မစ္စက်ဘမောင်ဟု ပါရှိ၏။ ယဉ်ကျေးမှုအဖွဲ့နှင့် မိတ်ဆက်တွေ့ဆုံရန် သံရုံးက ဖိတ်ကြားခြင်းကြောင့် ဧည့်ခံပွဲ၌ ယဉ်ကျေးမှုကပွဲ ကပြလိမ့်မည်ဆို၍ သွားချင် စိတ် ပေါ်လာလေသည်။ မူမူသည် ဖိတ်စာကတ်ကို ခုံပေါ်သို့ ပြန်တင် လိုက်သည်။ လက်မြှောက်၍နာရီကြည့်လိုက်သည်။...
https://t.me/TheBookR